Get Adobe Flash player
ICTHUS Song

News and Events

Walk for Life 2017

Message of Archbishop Socrates B Villegas

February 18, 2017, 430am

Salamat sa Council of the Laity ng Pilipinas na siyang nanawagan para sa Walk for Life. Kaming mga pari at obispo ay kasama ninyong laykong lingkod sa bawat hakbang. Hindi kami mauuna baka hindi kayo makasunod. Hindi kami maglalakad sa likod baka maiwanan ninyo kami. Maglalakad kaming ng mga obispo at pari katabi ninyo. Kaagapay. Kaibigan. Kasama sa paglalakad. Sa Luneta pantay pantay tayo. Sabay sabay.

Narito tayo para sa Walk for Life alang alang sa mga hindi na makalakad dahil sa kasalanan natin sa kanila. Hindi sila makalakad dahil pinatay at tayo ay natakot makisangkot. Hindi sila makalakad dahil natatakot na baka sila ang isunod na barilin. Hindi makalakad dahil lulong sa droga. Hindi makalakad na pinatay ng mga addict nabulagan ng isip. Hindi makalakad dahil sa ating mga kasalanan dahil sa buhay.

Ang Walk for Life ay para sa kanila. Lalakad tayo at tatayo para sa kanila.

Ang Walk for Life ay hindi para ipagtanggol ang drug addict o ang mga mamamatay tao. Ang kriminal ay dapat arestuhin, kasuhan, hatulan at ikulong upang iwasto ang pagkakamali. Dapat patunayan ang pagkakasala sa korte ng batas hindi sa batas ng bala.

Ang Walk for Life ay hindi protesta kundi paninindigan para sa kabanalan ng buhay ng bawat tao na galing sa Diyos. Ang Walk for Life ay Walk for God.

Bakit madaling araw? Sapagkat sa mga oras na ito natin natutuklasan ang bangkay sa bangketa o malapit sa basurahan. Ang madaling araw na sana ay oras ng bagong simula ay nagiging oras ng luha at takot dahil sa mga pinatay sa magdamag.

Sa mga ganitong oras noong Disyembre 30, 1896 nagsimula maglakad si Dr Jose Rizal simula Fort Santiago patungong Luneta para bitayin ng firing squad.  Ang parusang bitay ay saliwa sa kabanalan ng buhay ng tao. Sa halip na bitay, linisin natin ang kapulisan, ayusin ang husgado at higpitan palakad sa bilangguan. No to death penalty. Yes to the reform of the criminal justice. Nananawgan po kami sa Congress na hayaang bumoto ang Kongresista ayon sa konsensiya. Ang partido politika ay pansamantala. Ang konsensiya ang tinig ng Diyos na nakatanim sa ating kalooban. Igalang ang konsensiya.

Marami pa pong kasalanan sa buhay na dapat natin labanan. ABCDE…

Abortion ay kasalanan sa buhay ng sanggol. Ang sanggol ay taong anak natin. Ang mahinang sanggol ay biyaya ng Diyos. Ang bawat sanggol ipagtanggol! Kapag hindi natin nilabanan ang aborsyon, aabot tayo sa pagpatay sa mga yagit ng lipunan. Ang taong yagit sa tingin ng iba ay taong iniligtas at mahal ng Diyos. Mahal ng Diyos ang mga mahihina at mistulang yagit. Kapatid natin sila.

Blasphemy ay paglapastangan sa ngalan ng Diyos. Kung ang Diyos ay hindi na ginagalang susunod na hindi igagalang ang mga nilikha ng Diyos. Ang lahat ng kasalanan sa Diyos ay nagsisimula sa blasphemy o pagyurak sa karangalan ng Diyos. Kapag lapastangan sa Diyos, sigurado lapastangan din sa Inang Kalikasan, lapastangan sa magulang, lapastangan sa kapwa, lapastangan sa buhay.

Corruption ay nakakamatay ng tao. Ang corruption ay pagnanakaw lalo na sa mga mahihirap. Perang dapat ipampagamot, perang pambili ng bigas, perang pamasahe sa bus, perang pantapal sa bubong na tumutulo, kinukupit ng mandarambong! Ang luha ng mahihirap na pinagnanakawan ng corrupt ay alam ng Diyos. Hindi kayo pwedeng magnakaw habampanahon. Alam ng Diyos ang lahat.

Droga ay laban sa buhay. Pinapatay ng droga ang taong gumagamit pati na ang mga inosenteng biktima nila. Rape dahil sa droga. Nakaw dahil sa droga. Patayan dahil sa droga. Marami ng buhay na winasak ang droga. Ang Walk for Life ay kontra droga. Ang Walk for Life ay hindi pagtatanggol sa drug addict at drug pusher. Masama ang droga. Nakakamatay ang droga.

Execution ay pagpatay. Dating tawag ay bitay, naging salvaging, naging summary execution, naging EJK. Ang pagpatay, ito naman ay gawin ng kriminal o kaya ay ipataw ng gobyerno bilang death penalty, pagpatay pa rin yan. We cannot teach that killing is wrong by killing those who kill. It also increases the number of killers.

Malapit ng sumikat ang araw. May pag asa tayo. Huwag matakot sa dilim. Huwag mamuhay sa takot. Kumakalat ang takot at pananakot. Tinatakot tayong papatayin. Tinatakot tayo at nagpapatakot tayo. Walang mananakot kung hindi tayo magpapatakot.

Harapin natin ang nananakot at ipakita natin ang ating lakas ng loob. Humarap tayo sa nagbabanta at ipakita na kasama natin ang Diyos na ating lakas. Hindi nila tayo maaaring takutin dahil mas malakas ang tiwala natin sa Diyos.

Bayang may tiwala sa Diyos. Huwag matakot. Lakad na para sa BUHAY! Walk for Life!​

 

MAY IBANG SAGOT LABAN SA KASAMAAN!

Message delivered by Archbishop Socrates B Villegas at the Rally for Life on December 12, 2016 in San Carlos City, Pangasinan.

Narito tayo upang manalangin. Ipinagdarasal natin ang Pilipinas. Tungkulin ng mabuting Katoliko na makibahagi sa pagpapaunlad ng bayan. Tungkulin ng mabubuting Katoliko na makiisa sa pagsugpo sa kriminalidad. Ang mabubuting Katoliko ay makabayan.

Ang mabubuting Katoliko ay laban sa droga. Ang mabubuting Katoliko ay laban sa panggagahasa sa kababaihan at musmos. Ang mabubuting Katoliko ay laban sa patayan. Ang mabuting Katoliko ay laban sa kidnapping at carnapping. Ang mabuting Katoliko ay laban sa pagnanakaw at pandarambong. Ang mabuting Katoliko ay laban sa smuggling at corruption.

Laban ang pamahalaan sa malalang krimen. Kasangga ng pamahalaan ang lahat ng mabubuting Katoliko. Kasalanan sa Diyos ang makibahagi sa drug abuse at drug push. Kasalanan sa Diyos ang rape at murder. Kasalanan ang maki bahagi sa estafa at plunder.

Kasama ng pamahalaan ang mabubuting Katoliko sa pagsisikap na huwag ng maka ulit sa masasamang gawain ang mga kriminal. Hindi dapat maulit ang masamang gawain. Kaisa tayo sa magandang layunin. Sugpuin ang kriminalidad.

Dapat bigyan ng katarungan ang mga naapi at nasaktan dahil sa krimen. Ito ang ibig sabihin ng makatarungang lipunan. Hindi dapat makalusot ang kriminal. Hindi dapat hayaang magkunwaring maysakit ang mga mayayamang kriminal at sa ospital na lamang ikulong daw! Kapag mayaman, rehab. Kapag mahirap, barilin. Kapag mayaman, Saint Lukes Hospital. Kapag mahirap, sa siksikang kulungan.

Ang gusto ng ilang Pilipino ay ibalik ang bitay para huwag nang umulit at huwag pamarisan. Ibigti, isilya elektrika o iniksiyunan ng lason ang mga kriminal.

Sino ang mag uutos? Ang hukuman. Sino ang hukuman? Tao. May tao bang hindi nagkakamali? Pwede bang magkamali ang hukuman? Katulad ng lahat ng tao, pwedeng magkamali. Paano kung matapos mabitay ay nakitang iba pala ang may kasalanan? Sorry na lang? Gayun ba? Ay mali? Maibabalik ba ang buhay ng nagpakamalang mabitay? Maibabalik ba ang buhay ng binaril na mistaken identity?

Magkaisa tayo laban sa droga at terorismo. Magkaisa tayo laban sa plunder at corruption. Magkaisa tayo laban sa child rapist at mamamatay tao! Paano?

ISAAYOS ANG CRIMINAL JUSTICE SYSTEM!

Ang criminal justice system ay may tatlong paa—law enforcement, courts at correction. Alagad ng batas, hukuman at kulungan. Kapag malinis at marangal ang criminal justice system, gaganda ang Pilipinas, aayos ang Pilipinas, uunlad ang bayan.

Kung may death penalty nga, subalit ang pulis pwedeng suhulan, yong mayayamang pwedeng magbayad, lusot agad.

Kung may death penalty nga, subalit ang fiscal ay pwedeng bayaran, yong walang pambayad lamang ang makakasuhan.

Kung may death penalty nga, subalit ang abugadong mahusay, mataas ang bayad, mahihirap lamang ang guilty sa hukuman.

Kung may death penalty nga, subalit ang judge pwedeng regaluhan, absulwelto agad ang highest bidder.

Kung may death penalty nga at nakulong, subalit sa loob ng bilibid ay pwedeng magtayo ng sariling suite at mag videoke at magsugal at mag drugs, anong kwenta ng bilibid na mas maganda pa kaysa sa 5star hotel?

Kung may death penalty nga subalit ang criminal justice system ay corrupt, mabagal at may kinikiligan at nakasilip kahit nakapiring ang mata, lalakas pa rin ang loob ng rapist at plunderer, ng pusher at killer. Tuloy ang ligaya,

Kung mahuli ka, makiusap ka. Kung ayaw sa pakiusap, bayaran mo. Kung ayaw pabayad, barilin mo. Kapag nabaril na, lagyan mo ng baril sa kamay ng bangkay at ireport—nanlaban.

Matatakot ang kriminal hindi dahil sa bitay. Matatakot sila kahit habambuhay na pagkakulong lang ang parusa kapag alam nila—walang pulis, walang judge, walang warden na pwedeng pakiusapan at bayaran. Mayroong ganoon. Dapat lahat ganoon.

Kapag ang criminal justice system ay mabagal, malabo at mahina, ang bitay ay para lamang sa kulang ang bayad sa pulis at sa judge at sa warden.

Walang ipanganak na kriminal. Walang isinilang na drug pusher agad at rapist agad. Walang ipinanganak na corrupt agad.

Kapag ang pamilya ay paaralan ng kabutihan, hindi lalaking kriminal ang bata. Kapag ang magulang ay may Diyos, ang mga anak ay magiging makadiyos din at hindi lilihis sa maling daan.

Kapag may magagandang trabaho at iginagalang ang karapatan ng manggagawa, gaganda ang Pilipinas.

Linisin ang kapulisan! Ayusin ang lahat ng hukuman! Higpitan ang bilibid at kulungan. Gawaing tamad ang patayin na lang ang suspect. Gawaing tamad ang bitayin na lang ang nagkamali sa halip na tulungang makapag bago.

Turuan ang mga anak at kabataan ng mabuting asal. Schools need education not condoms.

Trabahong marangal, hindi bitay ang kailangan!

We are against crime! We are against drugs and rape and plunder! We are against smuggling and kidnapping and terrorism! We are against social disorder. Hindi tayo kunsintidor sa mali. Hindi natin ipinagwawalang bahala ang kirot ng mga biktima ng krimen.

We are not protesting without a solution. We are protesting with an alternative.  Reform the criminal justice system.

The solution is not killing criminals! Our alternative is FULLNESS of LIFE for the guilty and the innocent. Fullness of life for the poor and the rich. Fullness of life for sinners and saints. Christ died for the criminals and the victims. The love of God is for all. Our love should be like God’s love. For ALL.

Amen.

Pahatid ng Arsobispo Socrates B. Villegas sa bayan ng Diyos sa Lingayen Dagupan tungkol sa rally sa Nobyembre 30, 2016

Pahatid ng Arsobispo Socrates B Villegas sa bayan ng Diyos sa Lingayen Dagupan tungkol sa rally sa Nobyembre 30, 2016

Maraming mga sinimulang pagkilos ng ating mga kababayan ang nagaganap sa iba’t ibang panig ng bansa. Nagiging sariwa na naman ang alaala ng sugat ng martial law na akala natin ay nakalimutan na. Ang mga kabataang akala ng marami ay walang pakialam, ngayon ay nagkakaisa sa paghahayag ng makabayang damdamin. Maraming nawala, namatay, nasugatan at napinsala dahil sa martial law. Ang karangalan ng kanilang pagpapakasakit ay dapat na alalahanin.

Ang pagmamahal sa bayan ay isang mukha ng pananampalataya sa Diyos. Sa anumang rally o symposium o protestang gagawin, palaging tandaan na ang paninindigan ay dapat na mula sa pagmamalasakit at hindi higanti. Ang ating pag-usapan ay mga isyu at prinsipyo at iwasan ang pagmumura at paghamak sa kapwa taong iba ang pananaw sa atin. Ang hinahanap ay katotohanan—katotohanang may pagmamahal. Huwag tayong magsiraan.

Nananawagan ako sa mga magulang na ikuwento sa mga kabataan ang buong kasaysayan ng diktadurya at huwag pabanguhin ang pangit o pagandahin ang kamalian. Ang paglimot sa mga namatay sa martial law ay paglibak sa kanilang kabayanihan.

Higit sa lahat, manalangin tayo upang malutas natin ang patung patong suliranin ng bayan sa lalong madaling panahon sa pamamaraang mapayapa, mababang loob at may paghihilom.

Kung sa inyong paninindigan, ang makisali sa mga rally ay kinakailangan at sa tingin ninyo ay bahagi ng ating tungkuling Kristiyano, kayo ay malugod kong hinihimok na dumalo dala ang aking basbas.

Patunugin natin ang mga kampana ng simbahan sa Archdiocese of Lingayen Dagupan sa ika tatlumpu ng Nobyembre hanggang ikalawa ng Disyembre tuwing ikaanim ng gabi sa loob ng limang minuto. Dasalin ang Angelus at ipagdasal ang bayan natin.

Ang alaala ay biyaya ng Diyos. Ang alaala ay guro sa kasalukuyan. Ang alaala ay haligi ng kinabukasan.

Huwag lumimot. Manindigan. Makisangkot. Huwag pabayaang mawalang muli ang kalayaan!

 

Pahatid ng Arsobispo Socrates B. Villegas sa Prayer Rally sa Dagupan City

Pahatid ng Arsobispo Socrates B. Villegas sa Prayer Rally sa Dagupan City noong Nobyembre 23, 2016

Nang si Santa Monica ay nasa bingit na ng kamatayan, nagbilin siya ng ganito kay San Agustin na kanyang anak:  Ilibing mo ang aking bangkay kung saan mo naisin. Huwag mong alalahanin ang pag paparangal sa aking bangkay. Iisa lang ang hiling ko sa iyo. Huwag mo akong kalilimutan sa altar sa bawat sandali ng Misa.

Ang paglilibing sa yumao ay gawaing banal para sa mga Kristiyano.  Hindi mahalaga kung saan. Bagamat ang paglilibing sa bangkay ng yumao ay tungkulin ng mga naiwanan dito sa lupa, ang higit na mahalaga ay ipanalangin ang kaluluwa ng mga yumao. Hanapin natin ang gantimpala sa langit hindi ang parangal sa libingan.

Si Jesukristo ay inilibing sa libingang ipinahiram lamang sa kanya subalit siya ang pinakadakila sapagkat inialay niya ang buong buhay para sa mundo.

Ang pinakamahalagang parangal sa yumao ay hindi isang magandang puntod. Mas mahalaga ang panalangin kaysa sa marangyang libingan.

Ang parangal sa yumao ay iginagawad nang kusa, hindi pinagpipilitang ibigay. Ang parangal sa yumao ay hinihintay na ipagkaloob hindi ipinaglalaban na makuha kahit ano ang mangyari. Ang tunay na marangal ay hindi natatakot sa liwanag ng katotohanan hindi nagtatago palihim. Ang parangal sa patay ay biyaya ng bayan hindi bunga ng labanan ng abugado. Ang parangal na pinilit ay mapakla. Ang parangal na ipinagpilitang makuha ay nakakasuka.

Nananawagan ako sa pamilya ng yumaong Ferdinand Marcos. Huwag sanang gamitin ng mga buhay ang bangkay ng yumao para sa kani kanilang pangarap at ambisyon. Sa katayuan ng yumaong Ferdinand Marcos hindi na niya kailangan ang parangal sa libingan. Ang kailangan niya ay dasal. Hindi madaragdagan ang kanyang kapayapaan sa kabilang buhay sa pamamagitan ng puntod sa Libingan ng mga Bayani.

Para sa mga pamilyang naiwanan, ang dapat gawin ay ihingi ng tawad ang kasalanan ng yumao. Lahat naman ng yumao ay nangangailangan ng kapatawaran. Ibalik ang ninakaw na mana. Iwasto ang pagkakamali. Ang awa ng Diyos ay naghihintay sa lahat ng taong mababang loob at nagsisisi.

Ang bayang nag rarally ay handa namang magpatawad bakit hindi?  Subalit ang pagpapatawad ay hindi maaaring pagpapaubaya sa masama; hindi pagyakap sa pananakit at pandarambong. Ang pagbabayad pinsala sa masama; ang kabayaran sa pinsala; ang paghingi ng tawad sa kasalanan—ang mga ito ay kailangan upang mapatawad, wika ni San Juan Pablo II.

Ang paglimot sa kahapon ay isang malaking kakulangan ng ating panahon. Kailangan nating alamin ang kahapon upang maitaguyod ang makabuluhang kinabukasan, sabi naman ni Pope Francis.

Bayan ang humihirang sa bayani hindi ang libingan. Ang tunay na bayani ay bayani kahit saan ilibing. Ang huwad ay huwad kahit igawa ng monumento

Mga kabataan, alamin ninyo ang kasaysayan. Huwag mag palinlang sa mga may masamang pangnanasa na pagandahin ang pangit at madilim na nakalipas. Magbantay laban sa sinungaling! Manalangin at manindigan.

Lord heal our land!

Decree convoking ALD Synod 2017

In the name of God. Amen

I, Socrates Buenaventura Villegas, by the grace of God and favor of the Holy See Metropolitan Archbishop of Lingayen Dagupan, keeping in mind the spiritual welfare of the People of God entrusted to my shepherding; having consulted the priests and the members of Christ’s faithful on the most important pastoral concerns affecting the Christian community within this ecclesiastical circumscription; having prayed and sought the intercession of the Mother of God under the title of Our Lady of the Rosary of Manaoag and pleading prostrate for  Divine guidance, do hereby decree that a SYNOD for the Metropolitan ARCHDIOCESE OF LINGAYEN DAGUPAN be convoked from the second day until the ninth day of September in the year of the Lord two thousand and seventeen at the Cathedral of Saint John the Evangelist in Dagupan City in the Province of Pangasinan, according the provisions of the Code of Canon Law specifically canons 460-468.

Furthermore, by virtue of the powers vested in me by ecclesiastical laws I do hereby decree that the main theme of the Synod shall be “COMMUNIO as GIFT and MISSION” divided into five specific agenda namely Communio for Social Engagement, Communio for Faith Formation, Communio for Divine Worship, Communio in Ministry and Apostolate and Communio with the Poor.

We admonish the People of God in the Metropolitan See of Lingayen Dagupan to pray and offer sacrifices that the Synod may be guided and blessed by the Lord the cornerstone of the Church (Eph2:20) and be fittingly brought to its successful completion and fruition. With firm devotion, we entrust the preparatory work and celebration of the Synod to the intercession of Saint Francis of Assisi whom God called to “rebuild His Church”.

Given at the Cathedral of Saint John the Evangelist, Dagupan City, this twentieth day of November in the year of the Lord two thousand and sixteen, the Solemnity of Christ the King

 

+SOCRATES B. VILLEGAS

Archbishop of Lingayen Dagupan

 

wordpress statistics